E totoro ake nei i tōna ringa ki Te Hemo

Kapuranga rā ki ngā pari kārangaranga o Hautū

E tioriori mai nei i tōna reo pōhiri

Ko te au wai tārutu o taku awa o Tongariro

Kei tua iti te pae tapu o ngā maunga kōrero

Ko te koimutuhanga o taku maunga o Tongariro

Ko te pungāwhā o te whanariki

Ko te pungātara o te puia

Ko te whare haruru o te rangi

o te kahui pārehe

Tongariro maunga Tongariro hūnuku!

Tongariro pararangi e!

Ka whakatekatau taku titiro atu

Ki ngā pukenga maunga kai

Ko Kūhārua o te puanga

o te huahua a Tāne

Ki te puke koutu o Pukekaikiore

Te huinga ara pāwhāiti o te kiore

Ko Rangitukua e tuoho kau nei

Ki te kōpū nui o te tai

Koia rā aku paerangi ngātoro

E toro paerangi

Tihei Mauriora!